Дар меҳмонхонаи «Hyatt Regency Dushanbe»-и пойтахт маросими ҷойизасупорӣ ба ғолибони мусобиқаҳои ҷумҳу­риявӣ оид ба волейбол (мардон ва бонувон) ва тенниси рӯйи миз барои дарёфти “Ҷо­ми Пешвои миллат" байни кормандони вазорату идораҳо ва ташкилоту муассисаҳои дав­латӣ баргузор гардид. 
Дар маросими мазкур Раиси Кумитаи кор бо ҷавонон ва варзиши назди Ҳукумати Ҷум­ҳурии Тоҷикистон Зулфи­қор Гулаҳмадзода иштирок ва суханронӣ намуда, гуфт, ки машғулиятҳои ҷисмонӣ барои ҳаматарафа тарбия додани шахс мавқеи муҳим доранд ва инсонро на танҳо аз лиҳози сиришт зебову тавоно месозанд, балки ба шарофати варзиш руҳи инсон низ покизаву қавӣ ва дунёи маънавии вай пурғановату мукаммал гардида, дар замираш иродаи қавӣ, интизоми шоиста, солимии тафаккур тарбия меёбад.
Тавре ӯ иброз намуд, давоми семоҳаи чоруми соли ҷорӣ аз ҷониби Кумитаи кор бо ҷавонон ва варзиши назди Ҳу­кумати Ҷумҳурии Тоҷикистон мусобиқаҳои варзишӣ аз намуди волейбол (мардон ва бонувон) ва тенниси рӯйи миз байни кормандони вазорату идораҳо ва ташкилоту муасси­саҳои ҷумҳурӣ гузаронида шуданд, ки инак онҳо натиҷагирӣ ва ҷамъбаст гардиданд.
Аз ҷониби ҳайати доварон ғолибону ҷоизадорони инфи­родӣ ва даставии мардон ва бонувон аз рӯйи тенниси рӯйи миз муайян шуданд. Аз ҷумла, ҷойи сеюм насиби Дилрабо Неъматзода ва ҷойи дуюм Муҳайё Маҳмудӣ гардида, зинаи ифтихории якумро Гулнора Нурляминзода соҳиб шуд.
Ғолибон миёни мардон дар ҳайати инфиродӣ аз намуди тенниси рӯйи миз чунин зина­бандӣ гардиданд:
- Ҷойи сеюм Некрӯз Саидҷо­нов. 
- Ҷойи дуюм Муҳаммад Ша­ри­пов.
- Ҷойи якум Сайфиддин Боронов. 
Ғолибони ҳайати даставӣ оид ба тенниси рӯйи миз:
- Ҷойи сеюм КВД “Амонатбонк”.
- Ҷойи дуюм Вазорати кор­ҳои дохилии Ҷумҳурии Тоҷи­кистон.
- Ҷойи якум Вазорати мудофиаи Ҷумҳурии Тоҷикистон.
Дар мусобиқаи варзишӣ оид ба волейбол (мардон ва бонувон) байни кормандони вазорату идораҳо ва ташкилоту муасси­саҳои ҷумҳурӣ низ ҷамъ­баст ва ғолибони он муайян ва қадрдонӣ карда шуданд. Дар навъи мусобиқаи волейбол миёни мардон ҷойи якуми ифтихориро тими Вазорати корҳои дохилии Ҷумҳу­рии Тоҷикистон ба даст оварда, ду зинаи баъдиро мутаносибан дастаҳои Кумитаи кор бо ҷавонон ва варзиши назди Ҳукумати Ҷумҳурии Тоҷики­с­тон ва Вазорати мудофиаи Ҷумҳурии Тоҷикистон ишғол намуданд.
Дар волейболбозӣ миёни бонувон ҳам ҷойи якуми ифтихориро дастаи Вазорати кор­ҳои дохилии Ҷумҳурии Тоҷикистон соҳиб гардид. Дар зинаҳои баъдӣ бошад, даста­ҳои Кумитаи кор бо ҷавонон ва варзиши назди Ҳукумати Ҷумҳурии Тоҷи­кис­тон ва Вазорати тандурустӣ ва ҳифзи иҷтимоии аҳолии Ҷум­ҳурии Тоҷикистон ҷой гирифтанд.
Шурои ҷумҳуриявии 
«Динамо» ВКД ҶТ