19 июли соли 2024 дар толори меҳмонхонаи «Бобоҷон»-и шаҳри Кӯлоб дар доираи Барномаи ислоҳоти милитсия барои солҳои 2021-2025 ва Нақша-чорабинии муштарак байни Вазорати корҳои дохилии Ҷумҳурии Тоҷикистон ва Дафтари барномавии САҲА дар шаҳри Душанбе барои соли 2024 мизи мудаввар таҳти унвони «Саҳми Шӯроҳои ҷамъиятӣ дар амалишавии ислоҳоти милитсия» баргузор гардид.

Дар мизи мудаввар Ҳамоҳангсози миллӣ оид ба ислоҳоти милитсияи ВКД Ҷумҳурии Тоҷикистон генерал-майори милитсия Азизулозода Сафиало Азизуло, муовини сардори Қисми минтақавии РВКД дар вилояти Хатлон оид ба гурӯҳи ноҳияҳои Кӯлоб подполковники милитсия Салимзода Бегиҷон, намояндаи Дафтари барномавии САҲА дар шаҳри Душанбе Маҳмадиев Ҳайдар Холович, раисони шӯроҳои ҷамъиятии ҚМ РВКД дар Гурӯҳи ноҳияҳои Кӯлоб, муовинони сардорони шуъбаҳои ВКД дар ҚМ РВКД дар Гурӯҳи ноҳияҳои Кӯлоб ва масъулини шуъбачаву гурӯҳҳои ҳифзи тартиботи ҷамъиятии минтақаи мазкур иштирок доштанд.

Нахуст дар кори ҷаласа Раиси Шӯрои ҷамъиятии ҚМ РВКД дар вилояти Хатлон оид ба Гурӯҳи ноҳияҳои Кӯлоб Шамсзода Зикриё баромад намуда, оиди фаъолияти шӯроҳои ҷамъиятӣ дар давоми 6 моҳи соли ҷорӣ ҳисобот дод.

Қайд гардид, ки дар давраи сипаришуда шӯроҳои ҷамъиятии минтақа фаъолияти худро баҳри пешгирии амалҳои номатлуб ва баланд бардоштани боварии аҳолӣ ба милитсия ба роҳ монда, дар ҳамкорӣ бо мақомоти корҳои дохилӣ ва қишрҳои фаъоли ҷомеа аъзоёни шӯроҳои ҷамъиятиро аз ҳисоби шаҳрвандони гуногункасб интихоб намуданд, то ки дар ислоҳоти милитсияи тоҷик ҳиссагузорӣ намоянд.

Ҳамчунин зикр гардид, ки дар ин давра аз ҷониби шӯроҳои ҷамъиятӣ, як қатор чорабиниҳои мақсаднок, аз қабили чорабиниҳои гуногуни маърифативу варзишӣ, ташкили ҳисоботи нозирони минтақавии милитсия дар назди аҳолӣ, паҳн намудани видеолавҳаҳои тарғиботӣ, нашри мақолаҳо дар матбуоти даврӣ ва корбариҳо дар самти иҷрои Барномаи давлатии ислоҳоти милитсия барои солҳои 2021-2025 роҳандозӣ карда шуданд.

Дар рафти ҷаласа Ҳамоҳангсози миллӣ оид ба ислоҳоти милитсия генерал-майори милитсия Азизулозода Сафиало Азизуло баромад намуда, таъкид кард, ки иштироки мустақими шаҳрвандони касбу кори гуногун дар ҷараёни ислоҳот хело муҳим буда, бояд шаҳрвандон имконияти осони пешниҳод намудани таклифу дархост ва фикру андешаро дошта бошанд. Зеро чунин имконият барои боз ҳам такмил ёфтани сохтори мақомоти корҳои дохилӣ, хубу самаранок гардидани самтҳои фаъолияти хизматӣ мусоидат менамояд.

Дар идомаи мизи мудаввар гузориши роҳбарони шӯроҳои ҷамъиятӣ дар шаҳри Кӯлоб, ноҳияҳои Фархор, Ҳамадонӣ, Балҷувон, Данғара, Ховалинг, Темурмалик, Абдураҳмони Ҷомӣ, Ш.Шоҳин, Муминобод ва дигар шахсони масъул оид ба фаъолияти корӣ дар давоми нимсолаи аввали соли 2024 шунида шуд.

Дар ҷараёни маърӯзаҳо таклифу пешниҳод ва муҳокимарониҳо дар самти беҳбуд бахшидан ба фаъолияти шӯроҳои ҷамъиятӣ, ҳарчӣ наздик сохтани аҳолӣ бо милитсия ва иштироки шаҳрвандон дар раванди ислоҳоти милитсия сурат гирифт. Гуфта шуд, ки фаъолият дар самти анҷом додани корҳои профилактикӣ ва ҳисоботи давравии нозирони минтақавии милитсия дар назди аҳолӣ мунтазам ба роҳ монда шавад, то ин ки шаҳрвандон вобаста ба вазъи криминогении минтақаи истиқоматиашон маълумот гирифта дар бартарафсозии он иштирок намоянд.
Ҳамчунин, Ҳамоҳангсози миллӣ оид ба ислоҳоти милитсияи ВКД генерал-майори милитсия Азизулозода Сафиало Азизуло вобаста ба бо фармони Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон эълон гардидани соли 2024 ҳамчун "Соли маърифати ҳуқуқӣ" зикр намуд, ки Вазорати корҳои дохилӣ дар заминаи иқдоми Президенти кишвар, тасмим гирифта буд, ки Низомномаи шӯроҳои ҷамъиятиро дар таҳрири нав таҳия намуда, барои тасдиқ ба Ҳукумати Ҷумҳурии Тоҷикистон пешниҳод намояд. Низомномаи мазкур 13 феврали соли 2024, № 59 аз ҷониби Ҳукумати Ҷумҳурии Тоҷикистон тасдиқ гардид. Имрӯз масъулини ҷузъу томҳои Вазорати корҳои дохилии Ҷумҳурии Тоҷикистонро зарур аст, ки баҳри таъмини иҷрои қарор мазкур чораҳои мушаххасро роҳандозӣ намоянд.
Дар охир, Ҳамоҳангсози миллӣ оид ба ислоҳоти милитсия генерал-майори милитсия Азизулозода Сафиало Азизуло барои беҳтару хубтар ба роҳ мондани фаъолияти шӯроҳои ҷамъиятӣ ба масъулин дастуру супоришҳо дод.
Иштирокчиёни мизи мудаввар аз баргузор гардидани чунин ҳамоиш ва ҳамкории зичи онҳо бо кормандони мақомоти корҳои дохилӣ изҳори хушнудӣ намуда, иброз доштанд, ки омодаанд барои таъмини амният, тартиботи ҷамъиятӣ ва пойдории сулҳу субот дар кишвар пайваста саҳми назарраси худро гузоранд.
Гул Маҳбуба, Фаррух Самадзода